Lemon flytur og fer í Hafnarfjörð

Töluverðar breytingar eru framundan hjá veitingastaðnum Lemon þar sem nýr staður verður opnaður við Hjallahraun í Hafnafirði í mars auk þess sem Lemon á Laugavegi verður færður úr núverandi húsnæði við Laugaveg 24 að Laugavegi 56, þar sem verslunin Nikita var áður til húsa.

Nýja húsnæðið á Laugarveginum er á þremur hæðum og mun stærra en núverandi húsnæði. Jón Gunnar Geirdal, eigandi Lemon, segir mikla traffík á Laugarveginum auk mögulegra nýjunga sem síðar verða kynntar hafa kallað á stærra húsnæði. Staðurinn verður fluttur í byrjun mars og vonast Jón Gunnar til þess að ná fullkomnum skiptum þannig að Lemon þurfi ekki að loka á Laugarveginum í flutningunum.

Lemon í Hafnarfirði í apríl

Þá verður Lemon einnig opnaður við Hjallahraun, þar sem Hrói Höttur var áður, um miðjan apríl. Jón Gunnar segir viðskiptavini hafa einna helst kallað eftir nýjum stað í Hafnarfirði og á Akureyri. Hann segir Lemon á Akureyri vera á teikniborðinu en óljóst sé hins vegar hvenær af því verði.

Lemon sérhæfir sig í ferskum söfum og samlokum en þar er einnig hægt að fá hafragraut, salöt, jógúrt, ávexti og fleiri vörur.

Jón Gunnar Geirdal Kristinn Ingvarsson

• Blogga um frétt