Olíuverð hefur lækkað hressilega í verði á mörkuðum í morgun eftir að Grikkir höfnuðu lánakjörum sem þeim buðust hjá alþjóðlegum lánadrottnum. Jafnframt hefur áhrif á olíuverð að margt bendi til þess að hráolía frá Íran muni snúa aftur á alþjóðlega markaði ef samningar nást við Írani í kjarnorkudeilunni.
Verð á Brent Norðursjávarolíu til afhendingar í ágúst hefur lækkað um 1,98 Bandaríkjadali í 58,34 dali tunnan á markaði í Lundúnum.
Í New York hefur verið á West Texas Intermediate hráolíu lækkað um 2,79 Bandaríkjadali í dag og er nú tunnan seld á 54,14 dali.
Sérfræðingar á olíumarkaði segja að fjárfestar veðji í auknu mæli á útgöngu Grikkja úr evru-samstarfinu en einnig skipti máli viðræður við Írana.
Alls sögðu 61,31% grískra kjósenda nei í þjóðaratkvæðagreiðslunni en 38,69% sögðu já. Þrátt fyrir þessa niðurstöðu segir forsætisráðherra Grikklands og formaður Syriza flokksins, Alexis Tsipras, að hún þýði ekki að tengsl Grikkja við Evrópu muni rofna.