Mark Karpeles, forstjóri japanska bitcoin-miðlarans Mt. Gox, hefur verið handtekinn í landinu. Honum er gefið að sök að hafa falsað upplýsingar um hversu margar bitcoin-einingar voru til staðar í miðlunarkerfi félagsins og blekkt þannig viðskiptavini Mt. Gox.
Það vakti mikla athygli þegar Mt. Gox, sem var tekið til gjaldþrotaskipta í fyrra, fór á hliðina eftir að bitcoin-einingar að jafnvirði um fimmtíu milljarða króna hurfu úr miðlunarkerfinu.
Stuttu síðar kvaðst félagið hafa fundið 200 þúsund „gleymdar“ bitcoin-einingar í rafrænu „veski“ sem stjórnendur þess sögðust hafa ranglega talið að væri tómt.
Karpeles, sem er franskur ríkisborgari, er ekki grunaður um sjálfan þjófnaðinn. Hann hefur neitað sök.