Stjórnvöld í Púertó Ríkó ætla ekki að greiða 422 milljóna dala afborgun sem er á gjalddaga í dag. Ríkisstjórinn segir að langið þurfi að halda uppi grunnþjónustu.
Ríkisstjórinn Alejandro García Padilla tilkynnti í beinni sjónvarpsútsendingu að þetta væri gert samkvæmt hans fyrirskipan. Ákvörðunin hefði verið mjög erfið. Þungur skuldabaggi hefur legið á landinu á liðnum árum og skuldar ríkissjóður Púertó Ríkó um 70 milljarða dala. Til að setja upphæðina í samhengi þá er landsframleiðsla Púertó Ríkó rösklega 100 milljarðar dala og íbúafjöldinn ríflega 3,5 milljónir
Stjórnvöld þar í landi hafa átt í viðræðum við bandarísk yfirvöld um lausn á skuldavandanum. Ekkert samkomulag hefur náðst. Púertó Ríkó er sérstakt sambandssvæði Bandaríkjanna.
Í ávarpinu sagðist Padilla óska þess að eyríkið gæti unnið að endurskipulagningu skulda á löglegan hátt.
Þrátt fyrir að stjórnvöld hafi ákveðið að greiða ekki þessa afborgun er óljóst hvernig fer um þá næstu en 1,9 milljarðar dala eru á gjalddaga í júlí.
Hvaðan kom eiginlega þetta skuldafjall, og hvers vegna gengur svona erfiðlega að standa í skilum?
Líkt og kom fram í umfljöllun mbl á dögunum varð efnahagsvandi Púertó Ríkó ekki til á einni nóttu. Efnahagslífið var lengi mjög háð styrkjum frá bandarísku alríkisstjórninni sem gerði vel við fyrirtæki sem settu upp rekstur á eyjunni.
Þetta gert til að vega upp á móti þeirri ákvörðun að binda í lög að lágmarkslaun á eyjunni skyldu vera þau sömu og á meginlandinu. Árið 2006 var skrúfað fyrir þessa styrki og fríðindi en reglur um lágmarkslaun stóðu óbreyttar og eitt af öðru hurfu fyrirtækin á brott. Bandaríski fjárfestirinn Peter Schiff segir það ekki síst lágmarkslaunastefnunni að kenna að samkeppnishæfni Púertó Ríkó sé eins slæm og raun ber vitni og stór hluti eyjaskeggja í dag atvinnulaus.
Það hjálpar heldur ekki til að mikill fjöldi fólks hefur yfirgefið eyjuna í leit að betra lífi. Íbúar Púertó Ríkó hafa bandarísk vegabréf og flykkjast til svæða eins og Flórída til að finna laus störf og betri laun. Undanfarin ár hafa á bilinu 50.000 eyjaskeggjar flutt á brott árlega svo ekki fjölgar í hópi skattgreiðenda.
Í ofanálag er atvinnulífið bæklað af aldagömlum reglum sem setja fyrirtækjum á eyjunni miklar skorður hvað varðar bein viðskipti við nágrannalöndin. Blaðamaður Guardian bendir á að nær öll flutningaskip í höfninni í höfuðborginni San Juan eru á leið til eða frá Bandaríkjunum.
Frétt BBC.