Sameinuð útibú Íslandsbanka á Kirkjusandi og Suðurlandsbraut verða opnuð á mánudaginn við Suðurlandsbraut. „Við erum að kveðja Kirkjusand núna,“ segir Edda Hermannsdóttir, samskiptastjóri Íslandsbanka, í samtali við mbl.is en höfuðstöðvar bankans sem voru við Kirkjusand í tvo áratugi hafa nú verið fluttar í Norðurturn Smáralindar.
Ákvörðun um flutning höfuðstöðvanna var tekin í apríl á síðasta ári. Í tilkynningu sem bankinn sendi frá sér kom fram að með breytingunni verði starfsemi höfuðstöðva, sem í dag fer fram á fjórum stöðum, sameinuð undir einu þaki þar sem 650 starfsmenn munu starfa. Mikil hagkvæmni fylgir sameiningunni en samanlagður fermetrafjöldi höfuðstöðvastarfsemi fer úr 13.900 í 8.600 fermetra í Norðurturninum.
Rakaskemmdir fundust í höfuðstöðvum bankans á Kirkjusandi og hófust í kjölfarið viðamiklar rannsóknir sem hafa staðið yfir á húsnæðinu ásamt því að það var hreinsað með það að markmiði að lágmarka áhrif á starfsfólk.
Að sögn Eddu er útibúið það eina sem eftir er af starfsemi bankans við Kirkjusand og eins og fyrr segir verður síðasti dagur þess á morgun. Með sameiningunni verður útibúið á Suðurlandsbraut stærsta útibú bankans en þau eru 14 talsins.
Spurð hvort hún sé bjartsýn á að sameiningin gangi vel svarar Edda því játandi og segir starfsfólk bankans ýmsu vant. „Við sameinuðum til að mynda 3 útibú í desember og það gekk mjög vel.“
Unnið er að endurbótum á útibúinu á Suðurlandsbraut sem mun opna undir heitinu Laugardalur og verður það opnað 10. apríl. Í millitíðinni verður útibúið starfrækt á 2. og 3. hæð Suðurlandsbrautar. Engar breytingar verða á reikningsnúmerum viðskiptavina vegna sameiningarinnar.