Arion banki og HS Orka hafa undirritað samning sem snýr að heildarfjármögnun HS Orku. Um er að ræða lánsfjársamning sem meðal annars mun nýtast til uppbyggingar Brúarvirkjunar í Biskupstungum auk þess sem fjármögnunin mun nýtast til frekari þróunar verkefna sem tengjast Reykjanesvirkjun og uppgreiðslu eldri lána. Þetta kemur fram í fréttatilkynningu frá Arion banka.
„Við erum mjög ánægð með að hefja samstarf með Arion banka á þessum tímapunkti. Það eru mörg spennandi verkefni fram undan hjá HS Orku og traustir samstarfaðilar sem hafa skilning á því umhverfi sem við vinnum í eru afar mikilvægir. Við vonumst til þess að þetta samstarf muni vera til hagbóta fyrir bæði fyrirtækin til lengri tíma,“ er haft eftir Ásgeiri Margeirssyni, forstjóra HS Orku, í tilkynningunni.