Glæpamaðurinn snotri sem varð frægur á einni nóttu þegar mynd af honum fór sem eldur í sinu um netheimana hefur verið dæmdur í rúmlega tveggja ára fangelsi. Maðurinn, sem heitir Jeremy Meeks, hlaut dóm á fimmtudaginn sl. fyrir ólöglegt vopnahald.
Lögreglan í Stockton í Kaliforníu birti mynd af Meeks á Facebook-síðu sinni í júní á síðasta ári sem fékk yfir 100 þúsund „like“ og hátt í 30 þúsund ummæli. Þar tóku margar konur til máls og höfðu orð á því hversu fagureygður Meeks væri og myndarlegur. „Ég er ástfangin af glæpamanni,“ skrifaði m.a. ein konan. „Er hægt að handjárna mig við hann“ sagði önnur. „Hann má ræna mér hvenær sem er,“ sagði sú þriðja.
Þá veltu sumar konurnar því fyrir sér af hverju hann væri á glæpabrautinni þegar hann gæti augljóslega átt farsælan feril sem fyrirsæta.
Meeks var handtekinn í tengslum við rannsókn lögreglunnar á ránum og skotárásum. Byssur fundust m.a. við húsleitir í tengslum við málið. Talsmaður lögreglunnar í Stockton sagði að Meeks væri „einn hættulegasti glæpamaður í borginni.“
Bandaríska fréttastofan ABC tók viðtal við Meeks í fangelsinu þar sem hann beið eftir að réttað væri í máli sínu. Þar sagði hann meðal annars að hann væri ekki þessi mikli glæpamaður sem allir halda. „Ég kann að meta athyglina en ég vill bara að fólk viti að þetta er ekki ég, ég er ekki einhver höfuðpaur í glæpagengjum.“
Samkvæmt frétt CBS fréttastofunnar komst Meeks á samning hjá módelskrifstofu í Santa Monica eftir að myndin af honum var birt, en það er þó ljóst að hann mun ekki sitja mikið fyrir á næstunni.
Frétt mbl.is: Fagureygður glæpamaður nýtur vinsælda
Frétt mbl.is: Styrkja myndarlega glæpamanninn
Frétt mbl.is: Gæti grætt milljónir á fyrirsætustörfum