„Þetta er mynd sem á skilið breiðan markhóp og víðtæka dreifingu. Óvæntur gimsteinn og hápunktur kvikmyndahátíðarinnar í Berlín.“
Þetta er meðal þess sem kemur fram í kvikmyndagagnrýni Front Row Reviews um íslensku kvikmyndina Fúsa sem var heimsfrumsýnd á alþjóðlegu kvikmyndaháttíðinni í Berlín á dögunum. Í umfjölluninni er Degi Kára hrósað fyrir vel unna mynd, og honum líkt við Moodysson og Vinterberg. Þá er Gunnari Jónssyni hrósað fyrir einstaklega náttúrulegan og góðan grínleik.
„Með söguþráð sem gæti gefið í skyn mjög þungt og þreytandi áhorf hefur Dagur Kári farið langt fram úr væntingum með því að gera ljúfa og blíða, en einnig gríðarlega fyndna kvikmynd.“
Fúsi segir frá titilpersónunni Fúsa, sem er liðlega fertugur og býr einn með móður sinni. Líf hans er í afar föstum skorðum og lítið sem kemur á óvart. Hann minnir á unga sem hefur komið sér þægilega fyrir í hreiðrinu og hefur enn ekki haft kjark til að hefja sig til flugs. Þegar ung stúlka og kona á hans reki koma óvænt inn í líf hans fer allt úr skorðum og hann þarf að takast á við ýmislegt í fyrsta sinn.
Gagnrýnandinn segir Fúsa sýna mannúðlega svipmynd af manni sem hefur margt á móti sér í lífinu. Í myndinni sé lögð áhersla á að sniðganga forsendur og fara heldur um raunhæfar en óvæntar slóðir. Kvikmyndin sé full af von, en þó sé ekki vikið langt frá myrku öflunum sem finna megi víða.
Sjá umfjöllun Front Row Reviews hér.
Frétt mbl.is: Fúsi fékk sitt pláss
Frétt mbl.is: Vel tekið á móti Fúsa