Páfagarður hefur sent frá sér yfirlýsingu þar sem fram kemur að Benedikt XVI páfi hafi alls ekki ætlað að móðga múslíma með tilvísun sinni í ummæli frá fimmtándu öld þar sem staðhæft var að Múhameð spámaður hefði einungis fært heiminum illsku og ómannúð. Segir í yfirlýsingunni að páfi hafi einungis viljað lýsa andstöðu sinni við ofbeldi byggt á hvers kyns trúarlegum grunni. Þetta kemur fram á fréttavef BBC.

„Það var vissulega ekki ætlun páfa að kafa djúpt ofan í hugmyndina um heilagt stríð og viðhorf múslíma til þess, hvað þá að særa tilfinningar trúaðra múslíma,” segir í yfirlýsingu Federico Lombardi, aðaltalsmanns Páfagarðs. „Það er ljóst að vilji hins heilaga föður stendur til þess að ýta undir virðingu og samræðu á milli trúarbragða og menningarheima og það á augljóslega við um íslam.”

Sendiherra Páfagarðs í Pakistan var kallaður á fund þarlendra stjórnvalda í dag vegna ummælanna og ráðherra trúmála í Tyrklandi fór fram á opinbera afsökunarbeiðni vegna þeirra en til stendur að páfi heimsæki Tyrkland í nóvember. Þá hafa samtök múslíma víða um heim mótmælt ummælunum í dag og þau verið fordæmd við föstudagsbænir.

Tengdar fréttir

Páfi reitir múslima til reiði

Páfinn sendir múslimum góðar kveðjur

• Mótmæla orðum páfa
• Páfi ætlar að hitta sendiherra múslímskra ríkja á Ítalíu
• Öryggisviðbúnaður við kirkjur í Betlehem og Jenin
• Öldruð ítölsk nunna skotin til bana í Sómalíu

» Fleiri tengdar fréttir

• Blogga um frétt