Sonur Vilhjálms Bretaprins og Katrínar hertogaynju, Georg, fór á stefnumót í dag og er þetta hans fyrsta opinbera hlutverk. Var hann að sögn rólegur og yfirvegaður þegar hann hitti hóp nýsjálenskra smábarna og lét hann grát einhverra þeirra ekki trufla sig við leik og störf.

Georg, sem er átta mánaða gamall, er í opinberri heimsókn ásamt foreldrum sínum á Nýja-Sjálandi en síðar er förinni heitið til Ástralíu.

Í dag átti hann leikstefnumót með tíu börnum í Wellington en boðið var skipulagt af samtökum sem nefnast Plunket.