Samtök, hlynnt aðild Íslands að Evrópusambandinu, hafa ákveðið að hefja samstarf undir yfirskriftinni Já Ísland. Segjast samtökin ætla að standa fyrir málefnalegri og upplýstri umræðu um ESB-aðild og markvissri kynningu á rökum og ástæðum fyrir aðildinni.
Í tilkynningu frá samtökunum segir, að opnuð hafi verið ný vefsíða undir merkinu Já Ísland. Þá hyggja samtökin á kynningar- og upplýsingaherferð með auglýsingum, greinaskrifum og heimsóknum á vinnustaði og fundahöldum.
Að Já Ísland standa Evrópusamtökin, Evrópuvakt Samfylkingarinnar, Sjálfstæðir Evrópumenn, Sterkara Ísland og Ungir Evrópusinnar.