Matreiðslunámskeið með Ellu Stínu

Í gær hélt Ella Stína, frumkvöðull og grænkeri, matreiðslunámskeið í Hagkaup Smáralind við góðar undirtektir. Í tilefni Veganúar og Heilsudaga bauð Hagkaup upp á námskeiðið þar sem Ella Stína sýndi listir sínar í eldhúsinu. Hún töfraði fram ljúffengt vegan-buff með thainí-sósu og bjó til gómsætt hakk og spagettí með nýja vegan-hakkinu sem hún kom með á markað nýverið en hún á fyrirtækið sem ber heitið Ella Stína sem framleiðir og selur vegan-matvörur. Nýja vegan-hakkið sló heldur betur í gegn á námskeiðinu og rann ljúft ofan í þátttakendur. Einnig sýndi hún frá því hvernig hún býr til vegan-parmesanost frá grunni.

Bauð upp á smakk

Í lokin sýndi hún hvernig hún gerir girnilegar kókoskúlur ásamt því að bjóða upp á smakk af hennar frábæru kökum sem hún selur meðal annars í Hagkaup. Það var samdóma álit þátttakenda að þetta hafi verið frábær kvöldstund með þessum matarfrumkvöðli.