Fyrirtæki í Ísrael, sem útvegar heimastjórn Palestínumanna bensín, sagði að ávísun frá heimastjórninni upp á rúmar 22 milljónir dala hefði reynst innistæðulaus í síðustu viku og því hefði eldsneytisflutningum til Palestínumanna verið hætt. Framkvæmdastjórn Evrópusambandsins tilkynnti í morgun að heimastjórnin fengu greiddar 120 milljónir evra, jafnvirði 142 milljónir dala, sem búið var að úthluta þeim.
Ísraelskur embættismaður sagði við fréttastofuna AFP að stjórnvöld gætu ekki gripið inn í mál sem tengdist einkasamningum.
Frá árinu 1994 þegar heimastjórn Palestínumanna var komið á fót, hefur fyrirtækið Dor-Allon útvegað Palestínumönnum um 600 þúsund lestir af eldsneyti og 120 þúsund tonnum af gasi. Heimastjórnin virkar eins og heildsali á eldsneyti fyrir heimastjórnarsvæðin.
Að sögn heimildarmanna skuldar heimastjórnin olíufyrirtækinu jafnvirði um 26 milljónir dala.
Heimastjórnin er í miklum fjárhagserfiðleikum sem gætu orðið enn verri í kjölfar sigurs Hamassamtakanna í þingkosningum í síðasta mánuði. Bæði Bandaríkin og Evrópusambandið hafa hótað að hætta fjárstuðningi við heimastjórnina ef Hamas viðurkennir ekki tilverurétt Ísraelsríkis og virðir ekki áður gerða samninga.