Hamassamtökin afhentu Mahmud Abbas, forseta heimastjórnar Palestínumanna, ráðherralista nýrrar heimastjórnar í kvöld. Hamas fékk hreinan meirihluta á heimaþingi Palestínumanna í kosningum í byrjun ársins en bauð samt öðrum herskáum samtökum aðild að ríkisstjórninni. Því boði var hafnað.
Ismail Haniyeh, forsætisráðherraefni Hamas, sagði að 24 ráðherrar yrðu í stjórninni, þar á meðal ein kona og einn kristinn maður auk tveggja háttsettra embættismanna Hamas, þeirra Mahmud al-Zahar og Said Siam.
Abbas sagðist myndu leggja listann fyrir framkvæmdanefnd Frelsissamtaka Palestínu á morgun.
Háttsettur ísraelskur embættismaður sagði í kvöld, að Ísraelsstjórn myndi ekki eiga nein samskipti við ríkisstjórn Hamas, sem hann sagði vera hryðjuverkastjórn.