Skátarnir komu í veg fyrir skógareld

Skátar úr Survivor Iceland leiðangri Rowervay mótsins lentu í óvæntum stórræðum á rómantískri miðnæturgöngu sinni umhverfis Hafravatn í gærkvöld.

Það vildi til happs að 15 manna hópur erlendra skáta var á göngu að tjaldbúð sinni við Hafravatn undir miðnætti í gær að þau sáu reyk leggja upp við rætur greni- og furuskógar í hlíðinni ofanvert við vatnið. Skátar er ávallt viðbúnir og franskir og ítalskir meðlimir hópsins sáu að þarna gat verið stórhætta á ferðum.

Hópurinn tók því á sprett upp að skógarrótum og hitti þar fyrir íslenskt par á fimmtugsaldri, „smelling of alcohol“ sem farið hafði heldur óvarlega með sígarettustubba sína í blíðviðrinu og þurrkinum.

Glóð hafði breytt úr sér í mosa og kjarri á allstóru svæði og gúmmífættu íslensku turtildúfurnar fengu ekki við neitt ráðið.

Hluti skátahópsins þusti niður í tjaldbúð og sótti þangað öll þau ílát og skóflur sem til taks voru á meðan aðrir trömpuðu niður svörðinn til að hindra útbreiðslu eldsins.

All nokkur spölur var niður að vatni og tók slökkvistarfið því nærri klukkustund þó allir legðust á eitt og nýttu stór og smá ílát til að bera vatn á eldinn.

Gúmmífættu íslensku turtildúfurnar með kaupstaðarlyktina, forðuðu sér af vettvangi þegar eldurinn fór að magnast en skátarnir stóðu vaktina og yfirgáfu ekki svæðið fyrr en fullvíst var að allar glóðir væru kulnaðar.

• Blogga um frétt