Argentínski knattspyrnumaðurinn Javier Mascherano hefur óskað eftir því að vera seldur frá West Ham. Hann kom til félagsins frá Corinthians í Brasilíu í lok ágúst ásamt Carlos Tévez en hefur mest lítið fengið að spreyta sig og ekki verið í leikmannahópnum í síðustu sjö leikjum West Ham.
„Ég verð að komast í burtu, ég get ekki verið áfram hjá West Ham án þess að spila. Á mínum aldri er nauðsynlegt fyrir mig að spila, annars staðna ég. Markmið mitt var að standa mig vel í Englandi en ég hef ekki fengið næg tækifæri til að sýna hvað í mér býr. Ef ég kemst ekki í lið West Ham verð ég að reyna fyrir mér annars staðar," sagði Mascherano.
Hann er 22 ára gamall og lék með Argentínu í úrslitakeppni HM síðasta sumar. Reiknað var með að hann yrði liði West Ham mikill styrkur en hann var aðeins þrisvar í byrjunarliðinu og kom tvisvar inná sem varamaður meðan Alan Pardew stýrði West Ham og hefur síðan ekki komist að í leikmannahópnum eftir að Alan Curbishley tók við stjórn liðsins. Mascherano hefur verið orðaður við bæði Liverpool og Juventus.