Harpa mældist á Richter

Ekki er örgrannt um að tónleika- og ráðstefnuhöllin Harpa hafi mælst á Richter á laugardaginn þegar Atli Steinn Guðmundsson blaðamaður á Morgunblaðinu og mbl.is fagnaði þar fimm tugum ára í afmælisveislu sem best verður lýst sem hreinum Hrunadansi.

Fleiri hundruð gestir mættu til gleðinnar og ráku einhverjir upp stór augu þegar Katrín Jakobsdóttir forsætisráðherra steig á stokk og kynnti til leiks tónlistarmann kvöldsins, sem reyndist enginn annar en Erpur Eyvindarson, sem þjóðin þekkir orðið betur undir listamannsnafninu Blaz Roca.

Þverskurður íslensks þjóðfélags birtist í Norðurljósum þetta laugardagskvöld og fulltrúar ýmissa menningarkima voru viðstaddir veisluhöldin sem óhætt er að segja að seint verði leikin eftir.