Lady Gaga eyðilögð með fótósjoppi

Eitt af undrum nútímatækninnar er myndvinnsluforritið fótósjopp. Lady Gaga hefur nú birt myndir af sér sem teknar voru á tökustað þegar hún sat fyrir hjá ítalska tískuhúsinu Versace. Myndirnar sem Gaga birti sýna söngkonuna áður en myndirnar komust í hendurnar á fótósjoppara. 

Hún er andlit Versace og vöktu myndirnar mikla athygli þegar þær voru frumsýndar. Ekki síst fyrir það hvað Gaga var óþekkjanleg og nánast alveg eins og Donatella Versace sjálf, eigandi Versace-tískuhússins (bara aðeins yngri). 

Nú er sem sagt komið á daginn að Gaga og Versace eru kannski ekki svo líkar eftir allt saman því myndirnar voru fótósjoppaðar fyrir allan peninginn. Húðliturinn er öðruvísi á Gaga á fótósjoppuðu myndunum og auðvitað er hún líka miklu grennri. 

Það er ágætt að minna sig reglulega á það að flest sem við sjáum í glanstímaritum er fótósjoppað. Það er þó ekki bara þannig í glanstímaritum því fótósjoppið virðist vera á uppleið hjá dagblöðunum eins og sést í nýjasta tölublaði DV. Magnús Scheving í Latabæ prýðir forsíðuna. Þegar myndirnar af honum eru skoðaðar má sjá vel að það hefur einhver mjög flinkur fótósjoppað íþróttaálfinn. Ég skora á Magnús Scheving að birta myndir af sér áður en kveikt var á fótósjoppforritinu.