Brúðarþema hjá Chanel

Karl Lagerfield sýnd Haute Couture línu sína fyrir Chanel í París í morgun. Eins og svo oft áður, þegar Chanel er annars vegar, var búið að smíða leikmynd utan um tískusýninguna. Tískusýningardömurnar voru því eins og þær væru í göngutúr um hefðarsetur sitt þegar þær sýndu þessa rómantísku og sumarlegu línu frá Chanel. 

Það mátti sjá ákveðið brúðar-þema í línunni sem er ansi hreint heillandi. Þær sem ætla að ganga í það heilaga á næstu mánuðum ættu að geta fengið góðar hugmyndir af þessari línu. Það að gifta sig í skikkju hefði líklega ekki hljómað neitt sérstaklega spennandi áður en þegar myndirnar af sýningunni eru skoðaðar liggur ljóst fyrir að það er margt vitlausara.

Skikkjur (ef þær eru rétt sniðnar og úr réttu efni) geta gert kraftaverk fyrir heildarmyndina. Þær sem vilja til dæmis ekki vera með bera handleggi ættu að skoða þennan möguleika. 

Í línunni er mikið um blúndur og púff og eru þessi snið notuð án þess að þetta komi eitthvað kjánalega út eða verði of væmið.