Ökumenn formúlu-1 liðanna munu merkja keppnishjálma sína til að sýna samstöðu og stuðning við Jules Bianchi hjá Marussia sem slasaðist alvarlega í japanska kappakstrinum sl. sunnudag.
Það var að frumkvæði landa Bianchi og ökumanns Toro Rosso, Jean-Eric Vergne, sem ökumennirnir sammældust um þennan virðungarvott. Munu þeir setja sérstakan límmiða á hjálma sína á kappaksturshelginni í Sotsjí núna um helgina.
Keppendur í aukagreinum helgarinnar, formúlunum GP2 og GP3, munu sömuleiðis merkja hjálma sína með þessum hætti.