Franski nýliðinn Esteban Ocon hjá Manor mun aka fyrir Force India á næsta ári, sé staðhæfing spænska vikuritins Formula Rapida reist á staðreyndum.
Í viðtali við blaðið heldur fyrrverandi formúlustjórinn Eddie Jordan því fram að Ocon hafi nú þegar skrifað undir samning um að taka við af Nico Hülkenberg sem keppir fyrir Renault á næsta ári.
Spámannshæfileikar Jordan eru annálaðir sakir þess, að hann hélt því fram fyrstur manna á sínum tíma, að Lewis Hamilton færi frá McLaren til Mercedes. Það gerði hann talsvert áður en ráðning Hamiltons varð opinber.
„Ocon verður hjá Force India, [Felipe] Nasr fer til Renault og [Esteban] Gutierrez til Sauber,“ spáir Jordan í Formula Rapida.
Þýska vikuritið Auto Motor und Sport segir, að með því að ráða Ocon til sín muni Force India fá þriggja milljóna dollara afslátt á vélakaupum sínum frá Mercedes.