Í virðingarskyni við franska ökumanninn Jules Bianchi hefur Alþjóða akstursíþróttasambandið (FIA) ákveðið að leggja bílnúmerinu 17.

Þetta er gert til að heiðra minningu Bianchi sem lést sl. föstudag, 17. júlí, af völdum meiðsla sem hann hlaut við skell á öryggisvegg í japanska kappakstrinum í Suzuka í fyrrahaust.

Bianchi hlaut alvarlega höfuðáverka og féll í dá er hann skall á vinnuvél við öryggisvegginn sem þar var að fjarlægja bíl sem flogið hafði út úr rennvotri brautinni í kappakstrinum.

Með ákvörðun FIA verður númerið 17 - sem Bianchi valdi sér - aldrei aftur notað í formúlu-1. „Þar sem bílnúmer eru nú valin af ökumönnunum sjálfum telur FIA það viðeigandi virðingarvottað taka númer Jules Bianchi, númer 17, úr umferð,“ segir í stuttri tilkynningu FIA.

Útför Bianchi fer fram nú fyrir hádegi í heimabæ hans, í frönsku Miðjarðarhafsborginni Nice.