Fyrrverandi FH-ingurinn Alexander Söderlund kom Rosenborg til bjargar í Þórshöfn í Færeyjum í kvöld en norska liðið lenti þar í miklu basli gegn Víkingi frá Götu í 1. umferð forkeppni Evrópudeildar UEFA.
Leikurinn var markalaus þar til Söderlund náði að skora á 82. mínútu og hann innsiglaði síðan sigur Þrándheimsmanna með öðru marki í uppbótartíma, þannig að lokatölur urðu 2:0.
Þar með ætti eftirleikurinn að vera tiltölulega auðveldur fyrir Rosenborg í heimaleiknum eftir viku en sigurliðið mætir annaðhvort KR eða Cork City í 2. umferð keppninnar.
Hólmar Örn Eyjólfsson lék allan leikinn í vörn Rosenborg í kvöld.