Sigurður Gunnar Þorsteinsson og Hörður Axel Vilhjálmsson, landsliðsmenn í körfuknattleik, áttu ólíku gengi að fagna með liðum sínum í Grikklandi og Belgíu í gær.
Hörður Axel lék sinn fyrsta leik með Limburg United í belgísku A-deildinni en lið hans steinlá fyrir Okapi Aalstar, 105:79. Hörður lék í 12 mínútur og skoraði 5 stig í leiknum. Limburg hefur tapað fjórum af fyrstu fimm leikjum sínum og er í sjöunda sæti af tíu liðum í deildinni.
Sigurður og félagar í AE Larissa unnu stórsigur á Arkadikos, 90:56, í þriðju umferð grísku A2-deildarinnar, þeirrar næstefstu í Grikklandi. Sigurður skoraði 9 stig í leiknum en AEL hefur unnið þrjá fyrstu leiki sína og er efst í deildinni.