Verri afkomu Haga og lækkanir á bréfum félagsins í Kauphöllinni má helst rekja til komu Costco hingað til lands. Þetta er mat hagfræðinga hjá Arion banka og Landsbankanum sem mbl.is ræddi við í dag.
Hagar sendu frá sér afkomuviðvörun í gær þar sem fram kom að breytt samkeppnisumhverfi hafi haft áhrif á rekstur og markaðsstöðu félagsins og að það hafi leitt til verri afkomu.
Markaðurinn brást nokkuð harkalega við í morgun og lækkuðu bréf Haga um tæp 10% við opnun markaða. Nú þegar þetta er skrifað nemur lækkunin 4,37%.
Konráð S. Guðjónsson, hagfræðingur hjá greiningardeild Arion banka segir að afkomuviðvörunin sem Hagar sendu frá sér í gær hafi ekki komið á óvart þar sem versnandi afkoma var gefin í skyn í síðasta uppgjöri. Hann telur það nokkuð ljóst að það sé koma smásölurisans Costco sem hefur haft áhrif á þessa verri afkomu Haga en verslunin var opnuð í Kauptúni 23. maí.
„Ég held að það sé alveg borðleggjandi að það er Costco sem hefur þessi áhrif. Ég veit ekki hvað annað ætti að gera það,“ segir Konráð í samtali við mbl.is. „Eftir að Costco var opnað byrjuðu bréfin að síga svolítið niður hjá þeim.“
Arnar I. Jónsson, hagfræðingur hjá hagfræðideild Landsbankans, tekur í sama streng. „Fyrst og fremst eru þetta áhrif vegna komu Costco, hvort sem þetta eru bein áhrif, þ.e. Costco að taka sölu frá Högum eða áhrif í gegnum verðlagningu, það að Hagar hafi þurft að leggja minna á sínar vörur vegna Costco.
Hann bendir þó á að eflaust komi einnig inn í þetta styrking krónunnar þar sem innkaupaverð lækkar og útsöluverð sömuleiðis.
Að mati Arnars eru viðbrögð markaðarins í morgun eðlileg. „Í afkomuviðvörun Haga frá því í gær kemur fram að magnminnkun í matvöruverslun hjá þeim hefur verið 9,4% sem er töluvert mikið. Þarna sjáum við hversu mikið minna af einingum er verið að kaupa í búðunum.“
Hann segir ljóst að titringur hafi verið á markaðinum vegna komu Costco og bendir á að bréf Haga hafi verið á niðurleið frá því í vor. „Ég held að innkoma Costco hafi haft meiri áhrif en fólk sá fyrir.“