Lína bauð í vöfflur

Fjölmenni er samankomið í Borgarleikhúsinu sem opnaði dyr sínar upp á gátt fyrir gestum á gangandi á hinu árlega opna húsi leikhússins. Boðið er upp á vöfflur og er sjálf Lína Langsokkur á meðal þeirra sem skemmta gestum.

Líflegt verður um að litast á öllum sviðum og um allt leikhús, en opið er í húsinu frá 13-16.

Gestir á öllum aldri geta upplifað töfra leikhússins, gægst baksviðs, farið í skoðunarferðir og bragðað á ljúffengum vöfflum sem leikhússtjórinn Kristín Eysteinsdóttir, mun reiða fram af myndarskap ásamt öðru starfsfólki.

Leikarar, leikstjórar, hönnuðir og tæknifólk verða við störf á öllum sviðum hússins; ýmist við æfingar eða sýningar eða til þess að svara spurningum sem brenna á forvitnum leikhúsgestum. 

Í forsal leikhússins er fjölbreytt tónlistardagskrá. Veislustjóri er Halldór Gylfason. Vignir Þór Stefánsson og félagar spila og Jóhann Sigurðarson, Katla Margrét Jóhannsdóttir, Gói og ofl syngja leikhúsperlur - auk þess sem ýmsar óvæntar uppákomur verða því leikhúsið getur sprottið fram alls staðar!

• Blogga um frétt