Breski grínistinn Ricky Gervais mun halda uppistand í Eldborg sumardaginn fyrsta, fimmtudaginn 20. apríl. Þetta kemur fram í tilkynningu frá Senu.
Segir þar að uppistandssýningin nefnist Humanity og sé hans fyrsta í sjö ár. 1.500 miðar verða í boði á sjö verðsvæðum, en miðarnir kosta frá kr. 7.990.
„Ricky Gervais hefur leikið, sungið, framleitt og skrifað í mörg ár. Hann skapaði þrjá vinsæla þætti og merkilegt nokk þá lék hann aðalhlutverkin í þeim öllum. Við erum að tala um The Office, Extras og Derek. Þessi fjölhæfi snillingur hefur unnið til fjölmargra verðlauna, þar af sjö BAFTA-verðlaun, fimm British Comedy Awards, þrjú Golden Globe verðlaun og tvö Emmy-verðlaun,“ segir meðal annars í tilkynningunni.
Miðasala er sögð hefjast föstudaginn 24. febrúar kl. 10 á Harpa.is. Póstlistaforsala Senu Live fer fram daginn áður, fimmtudaginn 24. febrúar kl. 15. Fá þá allir sem eru skráðir á póstlista Senu Live sendan póst með tengli sem gerir þeim kleift að kaupa miða samstundis, degi áður en almenn sala hefst. Skráning á póstlista Senu Live er hér.