Sjálfsmorðstilraun Manning staðfest

Lögfræðingar uppljóstrarans Chelsea Manning hafa staðfest að hún hafi reynt að fremja sjálfsmorð í síðustu viku, en áður hefur verið greint frá því að hún hafi verið flutt á sjúkrahús í kjölfar sjálfsmorðstilraunar. Manning var sakfelld fyrir að hafa stolið gögnum frá bandarískum yfirvöldum og lekið þeim til Wikileaks.

Lögfræðingar Manning hafa, að sögn fréttavefjar BBC, sakað Bandaríkjaher um að brjóta á rétti hennar til einkalífs, með því að greina frá því að hún hafi verið send á sjúkrahús. Í tilkynningu hersins var ekki gefið upp hver ástæða sjúkrahúsvistarinnar væri, en fjölmiðlar voru fljótir að tengja dvölina sjálfsmorðstilraun.

Chel­sea Manning var áður þekkt sem Bra­dley Mann­ing, en í yfirlýsingu sem hún sendi frá sér, eftir að hún var dæmd til 35 ára fangelsisvistar vegna gagnastuldarins, til­kynnti hún að hún væri kona. Manning sagðist þá hafa upp­lifað sig sem konu í lík­ama karl­manns frá barnæsku og fór fram á horm­ónameðferð í fang­els­inu. Hún afplánar dóm sinn í karlafangelsi.

Í fréttatilkynningum frá lögfræðingum Manning segir: „Chelsea ákvað að binda enda á líf sitt í síðustu viku. Hún hefði kosið að heilsufarsupplýsingar sínar væru einkamál og að hún geti  þess í stað einbeitt sér að því að ná bata. Hún veit að margir vilja vita hvernig henni líður og hún vill að allir viti að hún er undir stöðugu eftirliti í fangelsinu og býst við að svo verði næstu vikurnar.“

Twitter-skilaboð voru send frá Manning í gær sem sögðu: „Mér líður vel. Ég er fegin að vera á lífi. Takk fyrir umhyggju ykkar. Ég mun jafna mig.“