Spurði um opnun sendibréfa

Í fyrirspurn til dómsmálaráðherra, sem Birgitta Jónsdóttir, þingmaður Pírata, lagði fram á Alþingi í dag, var spurt um opnun sendibréfa.

Í fyrirspurninni, sem er í átta liðum var m.a. spurt hversu oft á árunum 2005–2013 höfðu íslensk stjórnvöld, eða einhver í þeirra umboði, opnað sendibréf til og frá Íslandi án þess að það hafi verið hluti af rannsókn tiltekins sakamáls. Jafnframt var spurt í hversu mörgum af þeim tilfellum var beðið um dómsúrskurð fyrir opnun sendibréfsins.

Í öðrum liði fyrirspurnarinnar var spurt um fjölda tilvika á árunum 2005–2013 sem íslensk stjórnvöld, eða einhver í þeirra umboði, hafi opnað sendibréf sem eru póstlögð innan lands og stíluð á innlent heimilisfang án þess að það hafi verið hluti af rannsókn tiltekins sakamáls.

Jafnframt var spurt hversu oft á fyrrnefndum tímaramma hafa sendibréf verið gerð upptæk án þess að það hafi verið hluti af rannsókn tiltekins máls og í hversu mörgum tilfellum var beðið um úrskurð dómara.

Birgitta óskaði einnig eftir því að fá að vita hvaða eftirlit er með beitingu þeirra lagaheimilda sem heimila opnun sendinga og hvort að Persónuvernd hafi veitt umsögn um það verklag sem er viðhaft við opnun sendinganna sem um ræðir.

Jafnframt var spurt um skilyrði til þess að  tolleftirlitið, eða aðrir sem sjá um opnun bréfasendinga, megi opna sendibréf.  „Er þess gætt að skráður sendandi eða viðtakandi sendibréfs eigi möguleika á að vera viðstaddur opnun þess? Ef svo er, hvernig er það gert? Ef svo er ekki, af hverju er það ekki gert?“ var meðal þess sem spurt var að í fyrirspurninni. 

Að lokum var spurt hvaða aðilar hafa leyfi á grundvelli íslenskra réttarheimilda til þess að opna bréfasendingar sem fara um íslenska lögsögu og hvort að ráðherra telji það verklag sem viðhaft er við opnun bréfasendinga uppfylli kröfur stjórnarskrárinnar um friðhelgi einkalífs.

• Blogga um frétt