Verið er að slökkva í síðustu glæðunum í hausaþurrkun Stakkavíkur í Grindavík en fjölmennt lið slökkviliðsmanna af Suðurnesjum hefur barist við eldinn í alla nótt. Ljóst er að tjónið er mikið en ekki hægt að segja til um hversu mikið á þessari stundu, segir Ásmundur Jónsson, slökkviliðsstjóri í Grindavík sem stýrir aðgerðum á staðnum.
Hann segir að um þrjátíu manns hafi komið að slökkvistarfinu en auk slökkviliðsmanna komu björgunarsveitarmenn og lögregla til aðstoðar. Tilkynnt var um brunann í hausaþurrkuninni, sem er í byggingu við höfnina í Grindavík, á ellefta tímanum í gærkvöldi.
Ásmundur segir ljóst að slökkviliðið verði að störfum áfram næstu klukkustundirnar enda þurfi að vakta svæðið ef eldurinn skyldi blossa upp á nýjan leik.
Nærliggjandi hús voru ekki í hættu að sögn Ásmundar en í sömu byggingu er stórt geymslurými sem slapp að mestu.
Ekki er vitað um eldsupptök en rannsókn hefst í dag.