Umferð af höfuðborgarsvæðinu út á land hefur gengið vel að sögn Lúðvíks Kristinssonar, varðstjóra í umferðardeild lögreglunnar. Páskahelgin er ein stærsta ferðahelgi ársins og segir Lúðvík að mikil umferð hafi verið út bænum í gær og í dag.
Allt hefur gengið vel fyrir sig og engin slys hafa orðið.
„Það virðast allir bara vera með góða skapið og afslappaðir,“ segir hann.
Lögreglan var með töluvert eftirlit í gær og stefnir á aukið eftirlit um helgina.
„Það hafa ekki verið neinir toppar. Þetta hefur gengið jafnt og þétt, allt á góðum takti.“
Engin sérstök álagssvæði hafa verið til vandræða segir Lúðvík aðspurður, en bætir við að meiri straumur ökutækja hafi verið inn á Suðurland.