Matur | mbl | 26.3.2024 | 21:00

Súkkulaðikaka í páskafötum

Þessi fallega súkkulaðikaka er komin í páskafötin og kemur úr smiðju Berglindar Hreiðars hjá Gotterí og gersemar. Samsett mynd

Hér er á ferðinni súkkulaðikaka í páskafötum úr smiðju Berglindar Hreiðars hjá Gotterí og gersemar. Páskarnir eru einn uppáhaldstími ársins hjá Berglindi „Þeir eru gott frí og um að gera að njóta með sínum nánustu, elda góðan mat, baka og bjóða besta fólkinu sínu í heimsókn,“ segir Berglind. Kakan sem Berglind ætlar að bjóða upp á, á páskunum er bæði ljúffeng og afar falleg að auki, mun eflaust sóma sér vel á veisluborðum landsmanna. „Hér er á ferðinni virkilega góð súkkulaðikaka með unaðslegu súkkulaði smjörkremi. Mér finnst ekkert leiðinlegt að skreyta kökur og fannst mér þessi koma ansi skemmtilega út. Það mætti setja hana í þrjú stærri kökuform ef þið viljið hafa hana aðeins lægri og breiðari í þvermál svo það er um að gera að leika sér með það sem hentar,“ segir Berglind að lokum.

Dýrðleg súkkulaðikaka skreytt með lifandi blómum og súkkulaðieggjum. Ljósmynd/Berglind Hreriðars

Ofan á kökunni er eins og horfa ofan í hreiður. Litríkt og fallegt. Ljósmynd/Berglind Hreiðars

Súkkulaðkaka í páskafötum

Súkkulaðibotnar

310 g hveiti
400 g sykur
200 g púðursykur
90 g Síríus kakóduft
2 tsk. matarsódi
2 tsk. lyftiduft
1 tsk. salt
350 ml súrmjólk
300 ml uppáhellt, sterkt kaffi (við stofuhita)
3 egg
200 ml matarolía
3 tsk. vanilludropar

Aðferð:

Hitið ofninn í 170°C.
Setjið bökunarpappír í botninn á 4 x 15 cm smelluformum og spreyið þau að innan með matarolíuspreyi.
Hrærið þurrefni saman í eina skál og blautefni í aðra.
Setjið hrærivélina í gang með þurrefnunum í skálinni og hellið blautefnunum rólega saman við.
Hrærið vel og skafið niður á milli, skiptið jafnt á milli formanna.
Bakið í 30-35 mínútur eða þar til prjónn kemur út með smá kökumylsnu á endanum en ekki blautu deigi.
Kælið botnana á grind og skerið síðan aðeins ofan af þeim til að jafna þá fyrir skreytingu.

Súkkulaði smjörkrem

220 g Síríus suðusúkkulaði
400 g smjör (við stofuhita)
600 g flórsykur
3 msk. Síríus kakóduft
2 tsk. vanilludropar
2 msk. uppáhellt kaffi

Aðferð:

Saxið suðusúkkulaðið gróft, bræðið og leyfið því síðan að ná stofuhita á meðan annað er undirbúið.
Þeytið smjörið í nokkrar mínútur þar til það verður létt og ljóst.
Bætið bræddu súkkulaðinu þá saman við og blandið rólega við smjörið.
Setjið flórsykur og kakóduft saman við í nokkrum skömmtum, hrærið vel og skafið niður á milli.
Bætið að lokum vanilludropum og kaffi saman við og hrærið vel.

Samsetning og skreyting

400 g Síríus suðusúkkulaði
3 Síríus páskaegg (minnsta gerð að eigin vali)
Fersk blóm að eigin vali

Aðferð:

Byrjið á því að saxa suðusúkkulaðið gróft niður og bræða það.
Búið næst til ílangar súkkulaðiplötur með því að dreifa úr bræddu súkkulaðinu með kökuspaða (þær fara síðan utan um alla kökuna svo gerið þær nógu langar til að hylja fjóra botna + krem). Setjið í kæli og leyfið að storkna. Þetta er hægt að gera áður en byrjað er að baka kökubotnana.
Smyrjið um 1- 1,5 cm þykku kremi á milli botnanna og síðan má setja um 1 cm lag af kremi utan á hana alla og slétta aðeins úr.
Smyrjið vel af kremi á toppinn og raðið síðan súkkulaðiplötum allan hringinn og reynið að hylja kremið eftir fremsta megni.
Skreytið að lokum toppinn með páskaeggjum og ferskum blómum.