Yoko Ono, ekkja bítilsins John Lennon, hefur gefið leyfi fyrir því að fágæt myndskot af Lennon verði notuð í heimildamyndina „The US Vs John Lennon” sem væntanleg er. Um er að ræða myndskeið úr einkaeigu parsins, brúðkaupsmyndir og ókláraðar kvikmyndir sem þau hjónin unnu að. Frá þessu segir á vefsíðu breska tónlistartímaritsins NME.
Myndin er sögð fjalla um árin 1966 fram til 1976, meðan Lennon barðist hvað mest gegn stríði og átti í vandræðum með að fá bandarískan ríkisborgararétt. David Leaf, annar leikstjóri myndarinnar segir myndina segja sögu sem mörgum sé gleymd. Fæstir hafi gefið þessum kafla í lífi Lennons gaum lengi, og að þeir sem ekki voru fæddir þá viti vart af honum.
Myndin verður frumsýnd á kvikmyndahátíðinni í Feneyjum sem nú stendur yfir.