Smartland Mörtu Maríu | Heimili og hönnun | mbl | 26.4.2024 | 22:00

Jakob og Sólveig selja í Vesturbænum

Ásett verð er 62.900.000 krónur. Samsett mynd

Grínistinn og handritshöfundurinn Jakob Birgisson og eiginkona hans Sólveig Einarsdóttir hafa sett íbúð sína við Öldugötu í Vesturbænum á sölu. Íbúðin er 64 fm að stærð og er á þriðju hæð í þríbýlishúsi sem reist var árið 1931.

Jakob hefur á síðustu árum getið sér gott orð í skemmtanabransanum þrátt fyrir ungan aldur, en meðfram uppistandinu hefur hann einnig komið að handritaskrifum, leiklist og dagskrágerð. Þá gaf Sólveig nýverið út hlaðvarpið Bragðheimar ásamt Evu Sigrúnu Guðjónsdóttur sem fjallar um mat og matargerð.

Jakob og Sólveig eiga saman tvö börn og hafa komið sér vel fyrir í íbúðinni sem hefur hlotið þó nokkrar endurbætur á síðustu árum. Íbúðin er björt með fallegum gluggum, floti á gólfum og upprunalegum loftlistum og rósettum sem skapa sjarmerandi stemningu.

Í stofunni má sjá fallega húsmuni. Ljósmynd/Af fasteignavef mbl.is

Klassísk hönnun frá árinu 1949

Stofa og borðstofa eru samliggjandi í björtu rými, en þar má sjá fallegt borðstofuborð úr olíuborinni eik frá Ethnicraft og String-hillurnar sem er klassísk hönnun eftir sænska arkitektinn Nils Strinning frá árinu 1949.

Frá stofunni er gengið inn í rúmgott hjónaherbergi um fallega tvöfalda rennihurð. Ljósblár litur prýðir veggi herbergisins, en bláa litinn má einnig finna í barnaherberginu þar sem veggfóður með fallegu blómamynstri gleður augað.

Sjá á fasteignavef mbl.is: Öldugata 40