Lewis Hamilton ók ögn hraðar en liðsfélagi hans Nico Rosberg á fyrstu æfingu keppnishelgarinnar í Mónakó, sem fram fór í morgun. Eftir að hafa verið vel á eftir lengst af setti Sebastian Vettel síðan þriðja besta tímann.
Talsvert var um smáóhöpp í brautinni er ökumenn gengu full langt í glímunni við öryggisveggi hinnar þröngu brautar furstadæmisins. Eins misstu margir bílana á bremsusvæðinu og út á afrennslissvæði við fyrstu beygju en gátu allir nema Felipe Massa hjá Williams haldið áfram.
Urðu báðir ökumenn Mercedes fyrir þessu og að lokum sprakk afturdekk hjá Rosberg. Þátttöku Massa lauk snemma er hann fór of harkalega utan í öryggisvegg og skemmdi fjöðrunarbúnað. Á tímum þeirra munaði að lokum 0,1 sekúndu.
Vettel var svo 0,3 sekúndum lengur með hringinn en Rosberg og fjórði varð Daniel Ricciardo hjá Red Bull rúmu þremur tíundu á eftir Vettel. Max Verstappen, liðsfélagi Ricciardo, varð síðan aðeins 63/1000 úr sekúndu á eftir í fimmta sæti.
Forveri Verstappen, Daniil Kvyat, setti sjötta besta tímann og var aðeins 55/1000 á eftir belgísk-hollenska táningnum. Í sætum sjö til tíu á lista yfir hröðustu hringi urðu svo Nico Hülkenberg og Sergio Perez hjá Force India, Kimi Räikkönen hjá Ferrari og Carlos Sainz hjá Toro Rosso. Munaði ríflega 1,5 sekúndu á besta hring hans og þeim besta hjá Hamilton.