„Þeir mæta brjálaðir til leiks“

Það má fastlega reikna með því að Hannes Þór Halldórsson markvörður íslenska landsliðsins í knattspyrnu hafi nóg að gera á milli stanganna þegar Ísland etur kappi við Holland í undankeppni Evrópumótsins á Amsterdam Arena vellinum á fimmtudagskvöldið.

Hannes hefur aðeins þurft að hirða boltann þrisvar sinnum úr netinu hjá sér í sex leikjum Íslendinga í undankeppninni og hann hélt marki sínu hreinu í fyrri leiknum gegn Hollendingum á Laugardalsvellinum.

En við hvernig hollensku liði býst Hannes við að mæta?

,,Ég reikna með þeim beittari og ákveðnari. Þeir þekkja okkur núna, eru undir mikilli pressu, spila á heimavelli og eru eiginlega með bakið upp að vegg. Þeir munu því pottþétt gera áhlaup á okkur fyrstu 20-25 mínúturnar í leiknum og mæta brjálaðir til leiks. Þetta er eitthvað sem við vitum og verðum undirbúnir fyrir. Við verðum að standa þetta af okkur og vinna okkur smátt og smátt inn í leikinn,“ sagði Hannes Þór Halldórsson við mbl.is í dag.

Þið hafið verið spurðir mikið af því hvort þið getið sætt ykkur við jafntefli í leiknum. Yrðu það ekki bara fín úrslit?

,,Maður fer aldrei í leiki til að spila upp á jafntefli. Við munum reyna að nýta möguleikana sem gefast í leiknum til að vinna hann en ef þú myndir spyrja mig eftir leikinn hvort ég hefði verið sáttur við jafnteflið þá myndi ég örugglega segja já. Vegna stöðunnar í riðlinum væri sterkt að taka stig,“ sagði Hannes Þór.

Hannes hafði sem kunnugt er vistaskipti í sumar. Hann yfirgaf norska B-deildarliðið Sandnes Ulf og er kominn í hollensku úrvalsdeildina þar sem hann spilar með Nijmegen eins og Kristján Gauti Emilsson. Spurður hvort hann sé sáttur hjá nýja liðinu sagði Hannes;

,,Ég er rosalega ánægður. Þetta er frábær deild. Allir leikir eru stórleikir og það er fullt af áhorfendum á öllum leikjum. Ég held að ég geti þróast aðeins sem markvörður og geti bætt mig. Nijmegen er flottur klúbbur og bæði mér og fjölskyldunni líður vel þar sem við erum.“

• Blogga um frétt