„Ég gerði hræðileg mistök og vil biðjast afsökunar. Ég vil segja fyrirgefðu við þjálfarann, félagið, samherja mína og stuðningsmenn,“ sagði varnarmaðurinn Serge Aurier en hann kallaði kallaði Laurent Blanc, knattspyrnustjóra sinn hjá PSG, meðal annars hommatitt (e. faggot), í myndskeiði á Periscope.
Blanc sagðist í gær vera ákaflega vonsvikinn með ummælin sem Aurier lét falla. „Ég lagði mig fram við að fá hann til Parísar og þetta eru þakkirnar sem maður fær. Þetta er aumkunarvert,“ sagði Blanc og ítrekaði að Aurier yrði refsað. Bakvörðurinn hefur átt fast sæti í liði PSG á leiktíðinni.
„Ég vil sérstaklega biðja þjálfarann afsökunar en ég get bara þakkað honum fyrir allt sem hann hefur gert fyrir mig. Ég mun samþykkja þá refsingu sem félagið ákveður en mistökin voru óafsakanleg og ég mun taka afleiðingunum,“ bætti Aurier við.
Aurier hefur verið settur í ótímabundið bann og verður ekki í leikmannahópi PSG sem tekur á móti Chelsea í kvöld. Leikurinn er fyrri leikur liðanna í 16-liða úrslitum Meistaradeildar Evrópu.
Fyrri fréttir mbl.is um málið: