Enska knattspyrnufélagið Rotherham United hefur ráðið Skotann Steve Evans sem knattspyrnustjóra karlaliðsins í annað sinn.
Skrifaði hann undir þriggja ára samning, en Rotherham er þegar fallið úr B-deildinni niður í C-deild.
Evans var áður stjóri Rotherham á árunum 2012 til 2015, þegar fyrrverandi landsliðsmaðurinn Kári Árnason lék með liðinu.
Skotinn litríki stýrði þá liðinu upp úr D-deild í B-deild á tveimur árum og tókst að halda liðinu í næstefstu deild á þriðja árinu, tímabilið 2014-15.
Í viðtölum hefur Evans vakið athygli fyrir að vera með munninn fyrir neðan nefið enda hefur hann í gegnum árin átt það til að láta mann og annan heyra það.