Fimleikakonan Eyþóra Elísabet Þórsdóttir var í gær valin bjartasta vonin eða efnilegasti íþróttamaður Hollands árið 2016 á uppskeruhátíð hollenska íþróttasambandsins. Eyþóra, sem er 18 ára gömul og dóttir íslenskra hjóna en fæddist í Hollandi, náði á Ólympíuleikunum í sumar besta árangri hollenskrar fimleikakonu frá upphafi. Hún hafnaði í 9. sæti í fjölþrautarkeppni sem um leið var næstbesti árangur evrópskrar konu í keppninni í fjölþraut.
Eyþór fór einnig fyrir hollensku sveitinni sem hafnaði í 7. sæti í sveitakeppni Ólympíuleikanna sem er einnig besti árangur hollenskrar kvennasveitar í fimleikakeppni Ólympíuleika.
Eyþóra er nú um stundir fremsta fimleikakona Hollands. Með valinu á uppskeruhátíðinni í gær er ljóst að gerðar verða enn meiri kröfur til hennar á næstu árum.
Sérstök valnefnd á vegum hollenska íþróttasambandsins stóð að valinu á efnilegasta íþróttamanni landsins samhliða vali á íþróttakarli og íþróttakonu ársins. Einnig voru veittar fleiri viðurkenningar. Meðal þeirra sem sátu í valnefndinni að þessu sinni voru knattspyrnuþjálfarinn Guus Hiddink og sundkappinn Pieter van den Hoogenband.