Kína lánar meira til þróunarlanda en Alþjóðabankinn

Kínversk stjórnvöld lána meira til þróunarlanda en sjálfur Alþjóðabankinn. Þetta kemur fram í nýrri samantekt breska blaðsins Financial Times.

Samkvæmt Financial Times þá lánaði Kínverski þróunarbankinn og Kínverski inn- og útflutningsbankinn að minnsta kosti 110 milljarða Bandaríkjadala til stjórnvalda og fyrirtækja í þróunarríkjum á árunum 2009 til 2010. Á sama tíma námu lán Alþjóðabankans til þróunarríkja um 100 milljörðum dala.

Kínverski þróunarbankinn og Kínverski inn- og útflutningsbankinn eru í ríkiseigu og felst útlánastefna þeirra að sögn breska ríkisútvarpsins, BBC, að tryggja hagsmuni stjórnvalda fremur en að hámarka hagnað. Bankarnir tveir gefa ekki út sundurliðanir á útlánum og þar af leiðandi þurfti Financial Times að styðjast við opinberar yfirlýsingar um útlán. Að sögn BBC þýðir þetta að bankarnir hafi í raun lánað mun meira til þróunarlanda á tímabilinu þar sem að ekki hefur verið tilkynnt um viðkvæma lánafyrirgreiðslu.

• Blogga um frétt