Breski kaupsýslumaðurinn Vincent Tchenguiz íhugar nú að stefna Kaupþingi vegna rannsóknar sem hann sætti í tengslum við viðskipti hans við bankann. Þetta kemur fram í Fréttablaðinu í dag.
Þar segir að Tchenguiz hafi fengið óháð teymi lögfræðinga til að skoða hvort grundvöllur sé fyrir hann að höfða mál á hendur Kaupþingi. Ástæðan er rannsókn bresku efnahagsdeildarinnar á viðskiptum hans við bankann.
Samkvæmt heimildum Fréttablaðsins hafa lögfræðingar Tchenguiz þegar hafið störf. Blaðið segir heimildamenn segja að einnig sé verið að skoða hvort höfða eigi mál gegn endurskoðunarfyrirtækinu Grant Thornton í Bretlandi, en starfsmenn fyrirtækisins hafi talið að félög í eigu Tchenguiz hafi lagt fram falsaða pappíra þegar þau fengu lán frá Kaupþingi.
Efnahagsbrotadeild bresku lögreglunnar (SFO) samdi í sumar við Vincent Tchenguiz um bætur vegna óréttmætrar handtöku á honum þegar embættið skoðaði tengsl hans við Kaupþing banka. Bæturnar námu tæplega 600 milljónum króna. Bróðir hans. Robert Tchenguiz, fékk einnig bætur vegna sama máls, eða tæpar 300 milljónir króna.
Rannsókn SFO á bræðrunum og fjárfestingafélögum þeirra kom til vegna falls Kaupþings og tengsla þeirra við bankann. David Green, forstjóri SFO, hefur beðið bræðurna afsökunar á handtökunum og að sátt hafi náðst í málinu án kostnaðarsamra réttarhalda.
Árið 2012 tók dómstóll til baka húsleitarheimild sem SFO hafði verið veitt, en við skoðun málsins kom í ljós að SFO hafði ekki verið með neinar öruggar heimildir fyrir þeim ásökunum sem lágu að baki húsleitarbeiðninni.
Frétt mbl.is: Yfirvöld semja við Tchenguiz-bræður