Í gær var greint frá því að Birgir Jónsson hefði látið af störfum sem forstjóri hjá flugfélaginu Play. Kom fram að hann hefði gert samkomulag um starfslok og að núverandi stjórnarformaður félagsins, Einar Örn Ólafsson, sem jafnframt er einn stærsti hluthafi félagsins, myndi setjast í forstjórastólinn.
Ekki voru þó nema 11 dagar síðan Birgir hafði sérstaklega tekið fram að hann væri ekki að láta af störfum sem forstjóri Play, enda væri það „draumastarfið“ sitt.
Oft er sagt að vika sé langur tími í pólitík og er ljóst að það getur einnig átt við viðskiptaheiminn. Þá hefur einnig lengi verið sagt að þegar knattspyrnustjórar tali um að þeir séu traustir í starfi að þá sé stutt í að þeir verði látnir fara.
En hvernig sem því er farið í knattspyrnuheiminum, þá er ljóst að hlutirnir voru fljótir að gerast hjá Play á síðustu dögum.
Birgir upplýsti í þar síðustu viku að hann væri genginn til liðs við sína gömlu félaga í þungarokkshljómsveitinni Dimmu. Þar er Birgir trommuleikari, en hann spilaði með Dimmu frá 2011 til 2018, auk þess að hafa spilað með nokkrum hljómsveitum í gegnum tíðina.
Upplýsti Birgir um þetta í færslu á Facebook, en þar nefni hann einnig að þetta hefði ekki áhrif á stöðu sína sem forstjóra Play. „Lífið er skrýtið og fallegt. Ég fékk tækifæri til að ganga til liðs við mína gömlu félaga í Dimmu. Þrátt fyrir mikið annríki í vinnunni þá ákvað ég að slá til. Til stendur að spila 5-6 tónleika á árinu. Til að taka af allan vafa þá er ég alls ekki að hætta hjá Play enda er það draumastarfið mitt,“ sagði Birgir í færslunni.
Eins og fyrr segir var í gær svo greint frá því að samkomulag hefði náðst um starfslok við Birgi. Mun hann starfa hjá félaginu til 2. apríl, en svo verða félaginu til ráðgjafar næstu mánuði. Haft var eftir Birgi í tilkynningu vegna breytinganna að hann gengi stoltur frá borði.
„Það hefur verið ævintýri líkast að taka þátt í uppbyggingu Play. Á tiltölulega skömmum tíma er orðið til öflugt íslenskt lággjaldaflugfélag með framúrskarandi vöru og þjónustu og bjarta framtíð. Virk samkeppni í flugi sem skilar sér í lægri fargjöldum, fjölbreyttum áfangastöðum og verðmætum erlendum gestum er sérstaklega mikilvæg fyrir eyju eins og okkar. Slík samkeppni varðar hagsmuni allra Íslendinga. Ég geng þess vegna ákaflega stoltur frá borði. Play hefur nú slitið barnsskónum og er orðið þroskað flugfélag. Ég hef átt gott og náið samband við Einar og félagið er í góðum höndum hjá honum. Ég hlakka til að sjá félagið blómstra undir hans forystu. Ég vil þakka viðskiptavinum og samstarfsaðilum fyrir einkar ánægjulegt samstarf. Ég mun svo kveðja stórkostlegan hóp starfsmanna á næstu dögum,“ var haft eftir Birgi.