Mark Rutte, forsætisráðherra Hollands, hefur játað að það hafi verið „rangt mat“ hjá honum að koma ekki í veg fyrir að konungshjónin færu í frí til Grikklands meðan á nokkurs konar útgöngubanni stendur í landinu.
Í Hollandi er nýgengi kórónuveirunnar næsthæst í Evrópu, um 500. Á fimmtudag var öllum veitingastöðum, kaffihúsum og börum í landinu lokað til fjögurra vikna, en forsætisráðherrann hefur sjálfur lýst því sem „hálfgerðu útgöngubanni“.
Því vakti það hneykslan margra þegar Vilhjálmur Alexander konungur flugu til Grikklands í frí á föstudag. Vegna háværrar gagnrýni flugu hjónin heim daginn eftir. Þau ferðuðust með einkaþotu og brutu engar sóttvarnareglur, en ýmsum þykir ákvörðunin taktlaus fyrir því.
Stjórnarandstæðingar í Hollandi höfðu kallað eftir því að Rutte forsætisráðherra útskýrði hvers vegna hann hefði ekki hvatt hjónin til að halda sig heima, enda er forsætisráðherrann jafnan upplýstur um dagskrá konungshjónanna og á í reglulegum samskiptum við kónginn.
„Ég var meðvitaður um fyrirhugaða Grikklandsför konungs. Mat mitt var rangt,“ segir Rutte. „Ég áttaði mig of seint á því að fríið, sem stóðs [þáverandi] reglur samrýmdist ekki fjölgun smit og hertari reglum,“ segir Rutte og vísaði til fyrrnefndra reglna sem tóku gildi á fimmtudag.
Konungurinn hefur sætt vaxandi gagnrýni í landinu fyrir að þykja úr tengslum við venjulegt fólk, en nýverið boðaði ríkisstjórnin úttekt á útgjöldum til konungsfjölskyldunnar.