Síldarlýsið komið í verslanir

Síldarlýsi frá frumkvöðlafyrirtækinu Margildi, með vægu appelsínubragði, er nú fáanlegt á Íslandi og herma nýjustu fréttir að fyrsta pöntun frá Litháen til dreifingar í Eystrasaltsríkjunum sé tilbúin til sendingar, að því er fram kemur á vef Matís.

Áður hafa 200 mílur fjallað um fyrirtækið en það hefur þróað sérstakar aðferðir til að kaldhreinsa lýsi til manneldis úr uppsjávartegundum á borð við síld, loðnu og makríl.

Hefur fyrirtækið einkarétt á vinnsluaðferðum sínum en með þeim má gera hágæða lýsi úr hráefni sem áður nýttist eingöngu í fóðurgerð. Lýsið má bæði nota í matvæli, til að auka næringargildi þeirra með heilnæmum omega-3-fitusýrum, og sem fæðubótarefni í fljótandi formi eða hylkjum.

Margildi fær hrálýsið hjá íslenskum fiskmjölsverksmiðjum, svo sem HB Granda, Síldarvinnslunni, Loðnuvinnslunni og Eskju, en fullvinnur afurðina hjá norskri lýsisverksmiðju.

Margildi hefur áður m.a. selt síldarlýsi til Bandaríkjanna og Noregs við góðar undirtektir, en fyrirtækið hefur unnið að nýsköpun sinni í nokkur ár í samstarfi við fjölmarga aðila, þar á meðal Matís, með styrkjum frá AVS, Tækniþróunarsjóði og Uppbyggingarsjóðum.

• Blogga um frétt