Victoria Beckham, eiginkona knattspyrnustjörnunnar Davids Beckhams, segir að hjónaband þeirra muni standa af sér fjölmiðlafár vegna fullyrðinga um að David hafi átt í ástarsambandi við fyrrum aðstoðarkonu sína í Madríd á síðasta ári. „Við höfum gengið í gegnum verra en þetta, og við munum standa þetta af okkur," segir Victoria í samtali við blaðið The Sun en Beckhamhjónin eru nú í skíðafríi í Sviss.

Bresk blöð fara hamförum vegna fullyrðinga, sem birtust fyrst í blaðinu News of the World á sunnudag um að Beckham hafi átt í ástarsambandi við Rebeccu Loos, fyrrum aðstoðarkonu sína. Fullyrt var í dag að Loos hefði selt blöðum upplýsingar um málið, þar á meðal berorð SMS-skeyti sem sögð eru hafa farið á milli hennar og Davids.

Rebecca Loos er 26 ára gömul dóttir hollensks sendifulltrúa. Hún starfar hjá fyrirtæki sem sá um mál Beckhams þegar hann flutti frá Englandi til Spánar á síðasta ári.

Beckham er þekktasti knattspyrnumaður heims um þessar mundir og sá tekjuhæsti. Hann er þjóðhetja á Englandi og fékk m.a. OBE orðuna í nóvember.

Tengdar fréttir

David Beckham sakaður um framhjáhald

Beckham segir líf sitt nánast óþolandi

• Beckham afar ósáttur við bresk blöð
• Victoría Beckham segist sannfærð um tryggð Davids
• Rebecca Loos ekki velkomin í Harrods
• Rebecca Loos í stefnumótaþáttinn Ást á laugardagskvöldi

» Fleiri tengdar fréttir

• Blogga um frétt