Spænska knattspyrnufélagið Real Madríd, sem David Beckham leikur með, hefur ákveðið að setja þau fjögur bresk blöð, sem gengið hafa harðast fram í umfjöllun um meint framhjáhald Beckhams, í bann og blaðamenn þeirra eru ekki lengur velkomnir á vallarsvæði spænska liðsins.
Þetta eru blöðin News of the World, Mirror, Daily Mail og The Sun. Segir Real Madríd að þessi blöð séu ekki velkomin á meðan Beckham leikur með félaginu.
Svo kann þó að fara að dvöl Beckhams á Spáni sé að styttast en í danska blaðinu BT í dag er sagt frá því að Roman Abramovítjs, eigandi enska knattspyrnuliðsins Chelsea, sé reiðubúinn að opna veskið og kaupa Beckham.