Barnastjarnan Jeremy Jackson, sem gerði garðinn frægan sem Hobie Buchannon í þáttunum goðsagnakenndu Baywatch, var á dögunum kærður fyrir grófa líkamsárás.
Daily Mail greindi frá því að Jackson hafi verið handtekinn í apríl fyrir að stinga mann níu sinnum með eggvopni. Leikarinn var aldrei kærður fyrir árásina.
Nú hefur hinsvegar borist kæra honum á hendur fyrir aðra hnífsstungu sem átti sér stað í ágúst. Að sögn réðst Jackson á konu með hnífi þegar hún reyndi að koma í veg fyrir að hann stæli bíl kærasta hennar.
Jackson flúði af vettvangi, en lögreglan hafði hendur í hári hans stuttu síðar. Hann á yfir höfði sér allt að sjö ára fangelsisdóm verði hann fundinn sekur.
Fyrr á þessu ári var leikarinn einnig sakaður um að hafa reynt að myrða fyrrverandi eiginkonu sína, Loni Willison, en hún dró kæru sína til baka.
Jackson lýsti því yfir í viðtali að hann hafi lengi átt í miklum erfiðleikum með fíkniefni, en 2011 fór hann meðal annars í meðferð vegna sterafíknar.