Ungum slökkviliðsmanni var bjargað lifandi úr rústunum í kínversku hafnarborginni Tianjin þar sem eldar loga enn rúmum 36 tímum eftir að tvær öflugar sprengingar í vöruhúsi í borginni. 17 félagar hans létust við björgunarstörf en yfir 50 létust í sprengingunum.

Slökkviliðsmaðurinn Zhou Ti, 19 ára, hefur verið fluttur á sjúkrahús í Tianjin og er líðan hans stöðug samkvæmt tilkynningu frá borgaryfirvöldum sem hafa staðfest fréttir af björgun hans á samfélagsmiðlinum Sina Weibo.

Á Sina Weibo voru birtar myndir sem sýndu Zhou liggjandi á sjúkrabeði með augun lokuð og fjölmarga áverka í andliti og höfði.

Ungi maðurinn einn rúmlega eitt þúsund slökkviliðsmanna sem voru sendir á vettvang eftir sprengingarnar. Yfir 700 eru slasaðir, þar af yfir 70 alvarlega. Enn er nokkurra slökkviliðsmanna saknað.

Yfirvöld segja að Zhou sé minnislaus frá þeim tíma sem hann kom á vettvang og því er ekki vitað hvort hann var meðal þeirra sem komu fyrst á vettvang eða hvort hann kom eitthvað síðar.

Yfirmaður slökkviliðsins segir að þeir slökkviliðsmenn sem komu fyrstir á vettvang hafi verið óvarðir gegn því sem mætti þeim. Sprengingarnar voru gríðarlegar en þær urðu í vöruhúsi þar sem mikið magn eiturefna er geymt. Rúður brotnuðu í húsum í tveggja kílómetra fjarlægð frá vettvangi og á hafnarsvæðinu, þar sem vöruhúsið var, er eyðileggingin gríðarleg.

Á samfélagsmiðlum í Kína hefur aðkoma yfirvalda verið harðlega gagnrýnd og sá fjöldi björgunarmanna sem fórst við hjálparstarfið.

Eins gagnrýna bloggarar hvernig frásagnir ríkisfjölmiðla í Kína eru af hörmungum sem þessum. Þeir upphefji þá sem koma að björgunarstarfinu og sleppa því að greina frá því hvað olli hörmungunum.