Lögreglumaður og starfsmaður dómstólsins voru drepnir þegar að bílasprengja sprakk fyrir utan dómstól í borginni Izmir í Tyrklandi í dag.
Tyrkneska ríkisfréttastofan Dogan sagði 11 hafa slasast í sprengingunni, sem sprakk við þann inngang dómshússins sem dómarar og starfsmenn dómstólsins nota.
Anadolu-fréttastofan segir lögregla hafa fellt tvo meinta hryðjuverkamenn í skotbardaga fyrir utan dómshúsið eftir sprenginguna, en þriðji maðurinn er sagður hafa sloppið.
Nokkrir sjúkrabílar voru sendir á vettvang, en að sögn Hassan Karabag, borgarstjóra bæjarfélagsins, þá særðust a.m.k. 10 manns í árásinni og þar af einn alvarlega.
Innan við vika er frá því að árásarmaður vopnaður byssu myrti 39 manns í næturklúbb í Istanbúl.