Franz Wrousis, sem særði fimm manns í árás með keðjusög í svissneska bænum Schaffhausen í gær var í dag handtekinn í bænum Thalwil um 60 km frá árásarstaðnum.
Svissneska lögreglan greindi frá þessu nú í kvöld, en gefin hafði verið út alþjóðleg handtökuskipun á hendur Wrousis. Tóku hundrað þýskir og svissneskir lögreglumenn þátt í leitinni, enda var hann talinn hættulegur og taldi lögregla að hann væri jafnvel enn með keðjusögina á sér.
Wrousis hafði áður komist í kast við lögreglu vegna brota á vopnalögum, en í gær réðst hann inn í skrifstofu tryggingafélags og særði fimm með keðjusög, þar af tvo alvarlega. Fréttir voru sagðar af því í dag að sá sem hefði slasast mest væri úr lífshættu.
BBC segir Wrousis hafa búið úti í skógi í nágrenni árásarstaðarins.